1.- Lehenengo lana leku aproposa aurkitzea izango da. Behar bada, ikastetxeko zuzendariaren baimena lortu beharko dugu areto edo korridoreren bat erabili ahal izateko.
2.- Esposizioa osatuko duten elementuak bildu behar dira. Etxean dituzuen beste herrialdeetako oroigarriak jaso behar dituzue, zenbat eta oroigarri gehiago, hobeto. Horretarako astebeteko epea zabalduko dugu.
3.- Taldeka antolatuko zarete. Talde bakoitzak kontinente bat hartuko du.
4.- Lortutako oroigarri guztiak gainbegiratu ondoren, gaika banatuko dituzue. Hormetako irudietan kontinente bakoitzeko mapak marraztu beharko dituzue eta herrien kokapena adierazi.
5.- Lehenengo lau urrats horiek emanda, ikerketa lana abiatu behar duzue. Liburutegira joan eta lortutako oroigarrien herrietako informazioa bilatu beharko duzue, talde bakoitzak aukeratu duen kontinenteari dagozkion herrietako informazioa jaso beharko du. Herrialde horietako ezaugarri ekonomikoen inguruko informazioa izango da esposizioaren ardatza: herrialde industrializatua den ala ez, indar gehien duten sektoreak, langabezia tasa, herrialde esportatzailea ala inportatzailea den, zorrak dituen ala ez, bataz besteko maila ekonomikoa altua ala baxua den, eta abar. Horrekin batera, zenbait datu atera: biztanle kopurua, bizimodua...
6.- Talde guztien artean esposizioaren izena eta herrialde bakoitzaren ondoan jarriko duzuen fitxan zein informazio mota jarri behar den adostu beharko duzue.
7.- Informazio guztia jaso ondoren esposizioa muntatzen hasi beharko da. Kontinenteetako mapak eskegi, oroigarriak eta bakoitzari dagokion fitxa bere lekuan jarri... Talde bakoitzak bere kontinentearen ardura hartu beharko du.
8.- Esposizioa iragarri. Ikastetxean jartzeko kartelak egin beharko dituzue, esposizioaren ordutegia eta zabalik egongo den egunak zehaztuz. Nahi izanez gero, gurasoek ikus dezaten egun bat programatu.
9.- Esposizioa zabalik dagoen bitartean taldeko norbaitek bere kontinenteari dagozkion datuak eman beharko ditu, bisitariek horrela eskatzen dioten bakoitzean.
10.- Esposizioa amaitu ondoren material guztia jaso eta oroigarriak itzuli. Esperientzia baliagarria suertatu baldin bazaizue, urtero antzeko zerbait egitea proposatu.
