Euskal Autonomia Erkidegoko biztanleak, orokorrean, pribilegiatuak gara. Baieztapen hori egiaztatzeko Hirugarren Munduko biztanleak nola bizi diren ikusi besterik ez dago. Geroz eta handiagoa da herrialde garatuen eta azpigaratuen arteko ezberdintasuna, eta gure ikasleei errealitate hori transmititzea komenigarria da. Batez ere, nolako bizimodua daukaten gogoeta egiteko eta herrialde txiroetako adin bereko neska-mutilak nola bizi diren ikusteko. Guri dagokigu pertsona informatuak eta sentikorrak haztea.

Asko dira desberdintasun hori murriztu nahian dabiltzan Gobernuz Kanpoko Erakundeak eta bestelako elkarteak. Ahalegina txalogarria da, baina guztioi dagokigu egunerokotasunean urrats txikiak emanez herrialde txiroen eta aberatsen arteko aldea murriztea.

Hartzen diren erabaki ekonomikoak berdintasunaren printzipioa, ingurumenarekiko errespetua, lankidetza edo lan-baldintza egokien aldeko apustua bultzatu behar dute. Horrekin batera, hondakinen gehiegizko produkzioa, beharrezkoak ez diren gastuak, eta batez ere, energiaren xahutzea murriztu behar ditugu. Garapen iraunkorraren alde egitea gure esku baitago. Gizarte justuagoa eraikitzeko lehenengo urratsak dira. Elkarrekin emango ditugu?