Alonsotegi ikastetxean aspaldi Agenda 21 proiektuan jardun dugu. Ura eta bioaniztasuna gaiekin lotuta Haur eta Lehen Hezkuntzako ikasle taldeek Ibaialde programan urtero parte hartzen dugu. Ikastetxearen inguruan diren bi erreka aztertzen ditugu: Azordoiaga eta Gongeda.

Errekak ikertzean ondorengo helburuak lantzen ditugu: errekenganako begirunea eta ardura areagotzea; errekan eta errekaz gozatzea; herriko erreken ezaugarri nagusiez ohartzea; errekari buruzko interesa piztea; errekari buruz dakitena adieraztea; errekan bizi diren izaki bizidunen aniztasunaz ohartaraztea; uraz esperimentatzea; urak izaki bizidunengan duen eragina behatzea; esperimentazio lanaren aurrean ondorioak ateratzea; uraren ezaugarriak identifikatzea…

Lehenik, Alonsotegiko udaleko planoan erreka kokatzen dugu. Errekara bidean bertako landaredia ezagutzen dugu, beraien ezaugarriez ohartuz. Ondoren errekak neurtzen ditugu. Gongedak eta Azordoiagak 5 metro inguruko zabalera dute eta ur korrontearen abiadura ez da oso azkarra (255 segundokoa 8 metrokoa). Bestalde, uraren tenperatua ez da 12 gradura iristen.

Jarraian, uretan sartu eta bertako laginak hartzen ditugu eskolara eraman eta lupa erabiliz beren ezaugarriez ohartzeko. Eskolako laborategian uraren analisia ere egin ohi dugu. Horren ondorioz jakin dugu Gongeda eta Azordoiaga erreketako uraren kalitatea ona dela.

Ibaialde Kanpainan burututako lanak eskolako Txoko berdean erakusgai jartzen ditugu.

Alonsotegi ikastetxea

2008ko azaroaren 3an Busturiako Madariaga Dorretxean Eskolako Agenda 21en inguruan antolatu zen ekitaldian parte hartu genuen ikasleak gara. Ekitaldian gure ikastetxek Eskola Ekologikoaren ziurtagiria jaso zuen, orain arte Garapen Iraunkorraren alde egin dugun lanarengatik.

Gure hizketalditxoan institutuan azken bost urteotan egindako lana laburbildu genuen. Biodibertsitatea, aztarna ekologikoa eta hondakinak landu ditugu, eta orain berriz mugikortasunaren gaiarekin gabiltza. Bitarte honetan beste hainbat ekimen gauzatu ditugu, hala nola: bertoko hazien kudeaketa, bertoko zuhaitzen landaketa, hondakinak birziklatzeko bereizketa, hondakinekin egindako proposamen artistikoak...

Guk institutua laster utziko dugu. Hori dela eta, aukera aprobetxatuz ondorengoa adierazi nahi dugu: EA21ean parte hartuz mundu hobeago baten alde egin dugu, lan horrekin disfrutatuz. Zuek ere anima zaitezte! Agur.

Gernika BHI (Amaiur, Irati, Jon, eta Roke)

Egutegiarena urtero antolatzen dugun ekintza da. Eskolako ikasle guztiak hizkuntzaren inguruko ekintza honetan murgilduz euskal kulturan sakondu nahi dugu. Lelo eta esaldi ezberdinekin hizkuntzarekiko harreman afektiboa lantzen dugu. Lehiaketa moduan antolatzen dugu. Batzordeak gaia zehaztu eta lanketa nola egin zehazten du (ekoizpen plastikoa eta testua). Gaia erabakita, 5. eta 6. mailako ikasleek esaldiak edo leloak asmatzen dituzte, gaia eta hizkuntza lotuz.

Urtez urte gai ezberdinak landu ditugu: Euskal Herriko mendiak, herri-kirolak, euskal artistak, euskal mitologia... Aurtengoan Euskal Herriko zuhaitzak aukeratu ditugu. Taldekako lanak izan dira, eta egin beharreko lana, hauxe: egokitutako zuhaitzaren irudia –fruituarena eta hostoarena ere bai–; zuhaitzaren definizioa, ezaugarri eta bitxikeriekin; eremu semantikoa –hitz eratorriak eta esanahia–, eta esaera zaharrak.

Lanak bukatuta, batzordera eraman eta egutegian jarriko dena aukeratzen da.

Gain-Zuri ikastetxea Urretxu (Gipuzkoa)

Azaroan Urola-Garaia eskoletako Agenda 21eko koordinazio bileran KONTSUMOA gaia gure ikastetxean lantzea erabaki genuen.

Gabonak gertu zeudenez eta garai honetan egiten den kontsumo gehiegikeria kontuan izanik gai honi heltzea erabaki genuen. Ingurumen Batzordeko bilera batean, gaia eztabaidatu zen eta gurasoek animatu gintuzten ikasleekin hau aurrera eramatera. Beraz, martxan jarri ginen.

Aurrera eramateko Ingurugelatik jasotako informazioa oso baliagarria izan zen. Batzordeko irakasleek ziklo bileretan tutoreei informazioa zabaldu zieten eta hauek geletan ikasleei. Lehenengo zikloko ikasleek gurasoen laguntza izan zuten lan hau gauzatzeko. Gainontzeko ikasleek geletan landu zuten.

Gabonetako kontsumo gehiegikeriaz jabetu eta gero, ikasleek arazo honi aurre egiteko proposamenak luzatu zituzten.

Gelako arduradunak eta batzordeko koordinatzailea elkartu ziren gelako proposamenak aztertzeko. Bilera honetan Gabonetako kontsumo arduratsuari buruzko DEKALOGOA osatu zen. Hau gelatan landu eta etxe guztietara bidali zen gurasoak ere arazo honetaz kontzientziatzeko.

Domingo Agirre Eskola Publikoa Legazpi (Gipuzkoa)