Hezeguneak Euskal Autonomia Erkidegoko ekosistemarik preziatuenetarikoak dira ingurumen aldetik balio handikoak direlako, gutxi daudelako eta gizakion esku-hartzearen ondorioz hezeguneen kontserbazioa arriskuan dagoelako.

Hezeguneak babesteko asmoz, Eusko Jaurlaritzak Euskadiko Hezeguneen Lurralde Plan Sektoriala onartu du. Ingurugiro Estrategiaren Agirian zehaztutako helburuen artean dago 2010erako EAEko hezeguneetako berrogeita hamar hektarea berreskuratzea. Momentuz, hogeita hamar hektarea eraberritu dira, eta datozen urteotan falta direnak berreskuratzeko konpromisoa hartua dugu.

Era berean, hezeguneak ingurumen hezkuntzan txertatzeko saiakera nabarmendu nahi dugu. Ikasleek bertako fauna, flora eta paisaia ezagutzeko eta barneratzeko ahalegina egitea garrantzitsua da, kontzientziak astintzen ditugulako eta etorkizunean ingurumena babestuko eta errespetatuko duten gizakiak hezten dituelako.