Ibaian nahiz bertara isurtzen diren korronteetan (hodietan, ibaiadarretan, erreketan…) hainbat alde kualitatibo aztertuz eta zenbait parametro fisiko-kimiko neurtuz, aztertutako uren kalitatea nolakoa den jakin ahal izango dugu. Datu horiek uraren kalitatearen adierazgarri diren hainbat ornogabe bentikoren presentzia edo gabezia aztertuz osatu ahal izango dira.
Gehienbat nabarmendutako ezaugarri negatiboak isurialde mediterranearreko aparrak eta kantauriar isurialdeko kiratsa izan dira.
Uretako hainbat konposatu kimikok, -fenolak, hainbat hidrokarburo, kloroa, deskonposatzen ari den materia organikoa edo alga eta onddoek askatutako esentziak-, usaina eman diezaiokete urari, oso kontzentrazio txikitan egon arren.
Detergenteek aparra sortu eta fosfatoa gehitzen diote urari (eutrofizazioa); halaber, murriztu egiten dute ibaiek beren urak arazteko berez duten gaitasuna, bakterioen aktibitatea zaildu egiten baitute; eta oztopatu egiten dituzte araztegietan gertatu ohi diren malutapen prozesua (solido txikiak, erreaktibo kimikoen bidez, sedimentagarriak diren solido handiagoei eransten zaizkie) eta sedimentazioa.
ITXURA Mediterranear isurialdea Kantauriar isurialdea
Usain txarra 24 29,7
Hildako arrainak 4 8,2
Aparra 52 10,7
Olioa 1,6 10,5
Landare ugari uretan 4 9,1
Zenbat ur-lasterretan adierazi den
Parametro fisiko-kimikoei dagokienez, lortutako datuen batez bestekoa onargarriak diren balioen barnean sartzen da, baina ez dugu ahaztu behar batez besteko balioak direla eta unitateetan lortutako datu guztiak ez direla positiboak izan.
PARAMETROA Mediterranear isurialdea Kantauriar isurialdea
pHa 7,3 7,32
Nitratoak 8,03 mg/l 8,61 mg/l
Nitritoak 0,24 mg/l 0,89 mg/l
Oxigenoa 9,24 mg/l 9,6 mg/l
Tenperatura 11,45ºC 13,51ºC
Jasotako batez besteko balioak
Aipatu dugun bezala, ornogabe bentikoak uraren kalitatea ezagutzeko erreferentzia dira, hainbat espezie bereziren presentzia edo gabezia kontuan hartuz gero. Azken kanpaina honetan bi isurialdeek ur-kalitate oneko unitateen portzentaje handia erakutsi dute.
|
